Plantun de Prouvènço

Pèr coumpara dos planto d'encò nostre

Leontodon tuberosus & Typha domingensis

Moulin-de-prat(-bóujoula)

Leontodon tuberosus

Asteraceae Compositae

Autre noum : Mounge.

Nom en français : Liondent tubéreux.

Descripcioun :
Aquéu moulin-de-prat trachis dins li tepiero sablouso e argilouso. Flouris de la fin de l'estiéu au printèms segound li plueio, e pièi passo lou gros de la calourasso bonodi sa racino bóujoulado, o tuberisado s'amas miés. Lis akène dóu bord de la flour coumpausado an eici ges d'eigreto e rèston de tèms après la cabusso dis akène dóu mitan.

Usanço :
Li racino soun manjado crus (Grèço, Espagno, Sicilo) e li fueio peréu en ensalado o cuecho à la vapour (F. Couplan, op.cit. p. 424).

Port : Erbo
Taio : 5 à 40 cm
Fueio : basalo
Tipe bioulougico : Geoufite
Cicle bioulougico : Planto renadivo

Gènre : Leontodon
Famiho : Asteraceae
Famiho classico : Compositae
Tribu : Cichorieae

Coulour de la flour : Jauno
Petalo : >6
Ø (o loungour) enflourejado : 2 à 3 cm
Flourido : Printèms Autouno - Ivèr

Sòu : Ca
Autour basso e auto : 0 à 800 m
Aparado : Noun
Setèmbre à abriéu

Liò : Tepiero sablouso - Tepiero argielouso - Ermas - Orle
Estànci : Termoumediterran à Mesoumediterran
Couroulougi : Estenoumediterranenco
Ref. sc. : Leontodon tuberosus L., 1759

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.